पदार्थान्वयभाषाः - सर्वे विवेकिनः परमात्मानमेव स्तुवन्ति। अतो हे मनुष्याः ! अद्यतना यूयमपि तमेव स्तुतेति शिक्षते। यथा। हे इन्द्र ! आयवः=आसमन्ताद् यान्ति प्राप्नुवन्ति परमात्मतत्त्वं ये ते=आयवस्तत्त्वविदो मनुष्याः। पूर्वपीतये=प्रथमतः पीतयेऽनुग्रहाय। स्तोमैः=विविधैः स्तोत्रैः। त्वा=त्वाम्। अभि=अभितः सर्वतः। गृणन्त=गृणन्ति स्तुवन्ति। तथा। समीचीनासः=समीचीनाः सम्यगञ्चन्ति पूजयन्ति ये ते समीचीनाः। ऋभवः=श्रेष्ठा नराः। त्वामेव। समस्वरन्=संस्वरन्ति संस्तुवन्ति। स्वृ शब्दोपतापयोः। रुद्राः=रुद् दुःखं द्रावयन्ति विनाशयन्ति ये ते रुद्राः परहितेच्छवो जनाः। पूर्व्यम्=पूर्वं प्रथमं पुराणपुरुषं त्वामेव गृणन्ति ॥७॥

पदार्थान्वयभाषाः - (इन्द्र) हे कर्मयोगिन् ! (आयवः) मनुष्याः (पूर्वपीतये) अग्रपानार्थं (स्तोमेभिः) स्तुतिभिः (त्वा) त्वां (अभि) अभिष्टुवन्ति (समीचीनासः) सज्जनाः (ऋभवः) विद्वांसः (समस्वरन्) त्वां प्रति शब्दायन्ते (पूर्व्यं) अग्रण्यं (रुद्राः) योद्धारः शत्रूणां भयङ्करः (गृणन्त) त्वामेव स्तुवन्ति ॥७॥