पदार्थान्वयभाषाः - हे रिशादसा=रिशादसौ रिशतां हिंसतां स्तेनादीनां निरसितारौ। यद्वा। रिशानां हिंसकानाम् अत्याचारिणाम् अत्तारौ विनाशकौ। हे पुरुभुजा=पुरुभुजौ बहूनां भोजयितारौ पालयितारौ प्रभूतधनौ च राजामात्यौ। युवाम्। नोऽस्माकम्। इमम्=प्रत्यक्षं पठ्यमानम्=स्तोमम्=स्तुतिं शास्त्रादिलक्षणम्। प्रति आगन्तमागच्छतं श्रवणाय। पुनः। हे नरा=सर्वस्य प्रजावर्गस्य नेतारौ। नोऽस्मान्। सुश्रियः=सुश्रीकान् शोभायुक्तान्। कृतम्=कुरुतम्। तथा तदर्थम्। इमा=इमानि पुरो दृश्यमानानि पार्थिवानि धनानि। अभिष्टये=अभिप्राप्तये। दातम्=दत्तम् ॥१७॥

पदार्थान्वयभाषाः - (रिशादसा) हे शत्रुनाशकौ (पुरुभुजा) बहूनां रत्नानां भोक्तारौ (नरा) नेतारौ ! (इमम्) एतम् (नः, स्तोमम्) अस्माकं स्तोत्रम् (आ) अभि (गन्तम्) आगच्छतम् (नः) अस्मान् (सुश्रियः) शोभनश्रीयुक्तान् (कृतम्) कुरुतम् (अभिष्टये) यज्ञाय च (इमा) इमानि भौतिकानि (दातम्) दत्तम् ॥१७॥