पदार्थान्वयभाषाः - (गङ्गे) हे गमनशीले नदि ! “गङ्गा गमनात्” [निरु० ९।२५] गच्छति हि यावद्गमनाय मार्गो भवेत् समुद्रान्तं न पुनर्मार्गः तथाभूते नदि ! (यमुने) हे यमुने नदि ! प्रकृष्टं मिश्रयन्ती सती खल्वन्यां नदीम् “यु मिश्रणे” [अदादि०] तथा भूते नदि ! “यमुना प्रयुवती” [निरु० ९।२५] (सरस्वति) प्रचुरजलवति “सरस्वती सर उदकनाम तद्वती” [निरु० ९।२५] (शुतुद्रि) शुद्राविणी क्षिप्रद्राविण्याशुतुन्नेव द्रवतीति वा [निरु० ९।२५] तथाभूते नदि (परुष्ण्या) इरावत्या भासवत्या नद्या सह भास्वति कुटिलगामिनि नदि ! “इरावती परुष्णीत्याहुः पर्ववती भास्वती कुटिलगामिनी” [निरु० ९।२५] (असिक्न्या) अशुक्लया “असिक्न्यशुक्लाऽसिता सितमिति वर्णनाम तत्प्रतिषेधोऽसितम्” [निरु० ९।२५] (मरुद्वृधे) मरुद्वर्धिते मरुतो वृधाः-वर्धका यासां ताः सर्वा नद्यः, तथाभूते “मरुत एना वर्धयन्ति” [निरु० ९।२५] (वितस्तया) अविदग्धयाऽतिग्रीष्मकालेऽपि या दग्धा शुष्का न भवति तथा भूतया नद्या सह (आर्जीकीये) विपाडाख्ये नदि “आर्जीकीयां विपाडित्याहुः” [निरु० ९।२५] (सुषोमया) सिन्धुना पार्थिवसमुद्रेण सह “सुषोमा सिन्धुर्यदेनामभिप्रसुवन्ति नद्यः” [निरु० ९।२५] (मे स्तोमं सचत आशृणुहि) ममाभिप्रायं यद्वा मह्यं प्रतिधिं स्वस्वस्तरं सेवयत तथाहि मदर्थं जलप्रदानं स्वीकुरु-इति प्रत्येकम् ॥५॥