टिप्पणी: ४−प्र-याजाः। अकर्तरि च कारके संज्ञायाम्। पा० ३।३।१९। इति प्र+यज देवपूजासङ्गतिकरणदानेषु−घञ्। प्रयाजानुयाजौ यज्ञाङ्गे। पा० ७।३।६२। इति कुत्वप्रतिषेधो निपात्यते। प्रकृष्टपूजनीयकर्माणि। वा। समुच्चये, पाद−पूरणे वा। अनु-याजाः। अनु+यज−घञ् पूर्ववत्−अनुकूलानि पूजनीयकर्माणि। हुतभागाः। हु दानादानादनेषु−क्त। भज भागसेवयोः−भावे घञ्। हुतस्य, दत्तस्य, दानस्य गृहीतस्य वा विभागाः। अहुत-अदः। संपदादिभ्यः क्विप्। वार्तिकम्, पा० ३।३।९४। अहुत+अद भक्षणे−भावे क्विप्। अदानस्य दानशेषस्य भोजनानि। धान्यधनादीनि। देवाः। १।७।१। विजयिनः। प्रकाशमयाः। पञ्च। सप्यशूभ्यां तुट् च। उ० १।१५७। इति पचि व्यक्तिकारे विस्तारे च कनिन्। विस्तीर्णाः, व्यक्ताः प्रसिद्धाः। संख्यावाची वा। प्र-दिशः। प्र+दिश दाने आज्ञापने च−क्विप्। प्रकृष्टा दानक्रियाः। प्राच्याद्याः सर्वा दिशाः वि-भक्ताः। वि+भज−क्त। प्राप्तविभागाः। अस्मै। आत्मने, मदर्थम्। सत्र-सदः। गुधृवीपचिवचियमिसदिक्षदिभ्यस्त्रः। उ० ४।१६७। इति षद्लृ विशरणगत्यवसादनेषु त्र प्रत्ययः। सीदन्ति यत्रेति सत्रं सदनं यज्ञः। सभास्थानम्। पुनः। सत्सूद्विषद्रुह०। पा० ३।२।६१। इति सत्रोपपदे तस्मादेव धातोः−कर्तरि क्विप्। सभासदः, सभ्यान्। कृणोमि। कृवि हिंसाकरणयोः−लट्। करोमि ॥